ZOMBI CHILD

No ano 1962, un home regresa do mundo dos mortos para traballar nas infernais plantacións de azucre de Haití. Unha moza haitiana cóntalles ás súas amizades o seu segredo familiar 55 anos despois, sen saber que isto levará a que un deles cometa unha atrocidade.

Crítica Cineuropa

Cerimonia vudú de cinema puro onde se convocan os nomes de Val Lewton e Jean Rouch para dar densidade a un relato de varias capas e tempos, que acaban por fundirse nun agora espectral de ceos rotos. Colonialismo, escravitude e un asoballamento racial que aínda hoxe pretende apoderarse de folclore alleo sen querer coñecer o outro, só para esquilmar unha cultura máis. Todo isto nesta ficción a dúas voces na que as estudantes dun instituto de elite se mesturan co Haití máis pintoresco e ancestral nun xogo de atracción/repulsa, significantes/significados, que deixa os suficientes ocos para que o espectador xogue coas pezas dun crebacabezas intelectual e visceral ao mesmo tempo. Película de tese e filme de terror, Bertrand Bonello demostra unha vez máis que o seu cinema é un dos máis apaixonantes da cinematografía mundial.