O Festival

Iso é Cineuropa, a marabillosa sensación de gozar do cinema na gran pantalla, cinema de prestixio para público heteroxéneo que mantén intacta a columna vertebral do festival. Compostela, en novembro, é o cine que transita do Teatro Principal ao Salón Teatro, de Numax aos Multicines Compostela e ao Auditorio de Galicia, espazos que abren as súas portas á creatividade, á multiculturalidade e á paixón.

Compostela e Cineuropa reafírmanse nas súas raíces, como o fai o cine nos seus clásicos, e por iso réndeselle homenaxe a talentos como o director Jean-Luc Godard e a actriz China Zorrilla. Mais o festival mantén invariables seccións como a Europea, Latidoamericano, Docs Cineuropa ou o esperado Maratón, seccións que desde as primeiras edicións nos fan ficar expectantes por poder ver na nosa cidade a mellor selección de filmes das mostras máis importantes de todo o mundo.

Nesas e noutras seccións poderemos asistir á proxección dos últimos traballos de recoñecidos cineastas como Rodrigo Sorogoyen, Rebecca Zlotowski, Paul Schrader, Mia Hansen Løve, Denis Côté, Hirokazu Koreeda e explorar as propostas de realizadores emerxentes como Charlotte Le Bon, Mikel Gurrea, Alice Diop, Paul Saintillan ou Valentina Murel.

Nesta 36 edición reivindícase o cinema musical, unha mirada ás bandas sonoras, ás coreografías, ao esquecemento da tristeza para pór música e revivir esas icónicas imaxes que xa forman parte do noso imaxinario. Todas e todos lembramos o cruel coreógrafo interpretado por Roy Scheider en All that Jazz, o malvado magnate de A pantasma do paraíso de Brian de Palma, a parella protagonista de New York, New York de Martin Scorcesse ou o abrigo amarelo que vestía Catherine Deneuve en Os paraugas de Cherburgo.

Para Ana Belén e Charo López será o noso recoñecemento. Premios Cineuropa para dúas profesionais dunha magnitude que vai alén do cinema pero que nos permiten repasar as nosas vidas a través da súa filmografía. E para João Pedro Rodrigues, pois o seu traballo encaixa coa pretensión de contar en Cineuropa con personaxes de primeira liña no panorama internacional. Sen esquecermos o cinema galego, nun momento álxido, representado polo cineasta Lois Patiño; a súa carreira como videocreador foi auspiciada inicialmente coa súa participación na mostra do Premio Novos Artistas do Auditorio de Galicia, polo que para nós é unha enorme satisfacción entregarlle este ano un dos galardóns Cineuropa.

Trinta e seis edicións xa contan unha historia, a dun festival que vai de boca en boca, a que se amosa nos integrantes do xurado novo que devecen por participar tras escoitaren falar de Cineuropa na súa familia. Estamos orgullosos de Cineuropa; do camiño transitado e dun presente no que continuamos na procura da maior utilidade para os nosos obxectivos, traballando esperanzados para adaptármonos aos novos valores e ás novas estruturas.

Non sería posible celebrar este festival sen os apoios de institucións públicas como o Consorcio de Santiago, a Deputación da Coruña, a AGADIC, o ICAA, o Instituto Camões ou a Embaixada de Uruguai e mais o de empresas privadas, o que dá conta da calidade do evento e do seu arraigo, polo que só lles podo dar as grazas.

Agradecemento que fago extensible a todas e cada unha das persoas que traballan para que todo estea a punto cando baixa a luz para a primeira proxección e durante todas as semanas que dura o festival.

Grazas tamén ao público que, como cada ano, volverá encher as salas para celebrar o cinema na 36 edición de Cineuropa!

Xosé A. Sánchez Bugallo
Alcalde de Santiago de Compostela

Nesta 36ª edición asentamos o carácter de Cineuropa como festival competitivo, con once películas a concurso e un xurado internacional que deixará para a nosa memoria o segundo palmarés con títulos que prometen descubrirlles talentos en auxe.

Adiantarémoslles a primicia da película española da tempada: Mantícora. E da que para boa parte do equipo é a grande obra deste 2022: Trenque Lauquen. Tamén ese absoluto e mesmerizante achado fílmico e historiográfico que é El caso Padilla, con imaxes da famosa autocrítica do artista na Habana de 1971.

Sentirémonos ben ledos de lles poder render tributo aos nosos Premios Cineuropa desta edición. Ana Belén e Charo López son aristócratas artísticas nadas da meritocracia de décadas ofrecéndonos rexistros sen os cales o cinema español non se entendería. Lois Patiño e a súa cosmogonía son un luxo que desde Galicia ocupa xa o gotha do panorama internacional. E o portugués João Pedro Rodrigues –del vimos no noso festival Odete, Morrer como un homem, A última vez que vi Macau e O ornitólogo— é o nome do fecundo cinema luso —tras as homenaxes a Manoel de Oliveira, Pedro Costa ou Miguel Gomes— ao que xa nos tocaba render tributo. Farémolo a través da película coa que revolucionou a Quincena de Realizadores do pasado Cannes, Fogo Fátuo, con brotes de musical queer que sintonizan moi ben co emblema temático desta edición.

Confíamos en que se mergullen a fondo nestas case tres semanas que converteron Cineuropa, grazas a vostedes, nesa gran festa da democratización do cinema máis sensible. No Festival Internacional de Cinema de Galicia.

Todas e todos os que aman o cinema posúen esa virtualidade de poder camiñar nas súas vidas polo tránsito da crítica realidade e, simultaneamente, evadirse polo rumbo á ilusión de cento e unha películas. Esa natureza desdobrada en dúas caras ou dous roteiros que, como dicía a tan estrañada Agnès Varda, unha canta, a outra non.

José Luis Losa
Director de #Cineuropa36