Ano
2019
Lauren e Ned están prometidos e moi namorados. Para que a voda saia á perfección, e co fin de que os pais poidan asistir ao feliz desenlace, a parella debe encontrar a nai de Lauren, desaparecida sen deixar rastro nalgún remoto lugar do norte de Australia.
Esta comedia romántica comeza como tantas outras: cunha voda estragada. Pero rapidamente, o outback australiano impón a súa personalidade e o filme colle o seu ton entre cantos tribais aborixes, cancións de Kylie Minogue e, por suposto, unha versión de Down under, dos Men at work. O contacto da protagonista coa terra dos seus antepasados mentres anda á procura da súa nai, fuxida dun matrimonio fracasado, vincúlaa coas cousas verdadeiramente importantes. A delicadeza do realizador para tratar os choques culturais afasta esta comedia doutros disparates australianos. Falando en prata: estamos moi lonxe de Crocodilo Dundee.