ROMANTIC COMEDY

A música e guionista Elizabeth Sankey investiga o pasado, o presente e o futuro das comedias románticas coa axuda dun amplo abano de xente do mundo do cine.

Crítica Cineuropa

Un filme que non pode obviarse nesta edición de Cineuropa é este documental feito enteiramente con imaxes de arquicoñecidos filmes hollywoodenses, concretamente os que pertencen a ese xénero tan ríxido, divertido e normativo chamado “comedia romántica”, o imperio de Hugh Grant, Richard Gere e tamén Julia Roberts ou Meg Ryan. A montaxe de pequenos anacos dunha chea de filmes deste estilo deixa completamente espida a estrutura deste tipo de cinema, profundamente conservadora e monótona. Pero non estamos ante unha película que pretende acabar coas comedias románticas; pola contra, a tamén música Elizabeth Sarkley monta un estupendo filme didáctico que non rouba nin un pouco dos méritos evidentes destas producións, un punto medio entre a crítica ácida e a homenaxe aos mellores títulos do xénero.