Ano
2019
Maud é arquitecta e nai. Debido a un malentendido, gaña unha competición para reacondicionar unha zona concreta de Notre Dame. Dividida entre as súas responsabilidades laborais e sentimentais, comeza a atravesar un remuíño emocional.
Válerie Donzelli representa neste filme, na súa dobre face de cineasta e actriz protagonista, un tipo de comedia francesa algo tronada e sofisticada, nun equilibrio que semella imposible para calquera outra cinematografía aínda que os imitadores saian como setas por todas partes. Estamos nun terreo moi afastado do seu logro anterior, o drama luminoso Declaración de guerra, onde contaba de forma autobiográfica a súa loita contra a enfermidade do seu fillo. Os problemas neste caso son máis mundanos e pasan por antigas parellas, proxectos arquitectónicos imposibles e unha comicidade ao límite do tolerable pero que cae de pé despois de camiñar en bastantes tramos pola corda frouxa. Unha radiografía do día a día dunha clase media sen capacidade de reacción para o mundo cada vez máis absurdo que estamos a construír entre todos.