LA GOMERA / THE WHISTLERS

Cristi, un inspector de policía corrupto, viaxa dende Romanía ata a illa canaria da Gomera para tratar de aprender o silbo, unha lingua propia do lugar baseada en asubíos. Grazas a esta lingua secreta, poderá liberar a un mafioso encarcerado e recuperar trinta millóns de euros, xa que só el sabe onde están agochados.

Crítica Cineuropa

O romanés Corneliu Porumboiu leva tempo demostrando no seu cinema unha querenza pola linguaxe e a semiótica. Se en Politist, adjectiv, outro policiaco narrado en “Corneliu time”, o punto cume chega cunha discusión en torno a un dicionario, aquí o “silbo” canario é a vertixe pola que se desliza este thriller divertidamente desartellado. O realizador colle os tópicos do xénero, como delatores, mulleres de mafiosos, velenos e un botín, desconéctaos da trama e tíraos ao chan para que os vexamos mellor. Cando un se fixa moito nunha palabra, esta perde significado. Pois o mesmo fai o cineasta romanés. A linguaxe cinematográfica segue aí, pero convertida noutra cousa.