KIMI TO, NAMI NI NORETARA (RIDE YOUR WAVE) / XUNTOS NO MAR

Cando entra na universidade, Hinako múdase a unha cidade costeira onde coñece a Minato, un bombeiro entregado a axudar os demais. A moza goza do seu pasatempo favorito, o surf, mentres inicia unha relación cada vez máis próxima con Minato. Por desgraza, unha inesperada traxedia arrebata a vida do mozo e ela fica completamente devastada. Incapaz mesmo de mirar o seu querido mar, un día, Hinako canta a canción de ambos e Minato aparéceselle en forma de auga para cumprir a promesa de seguir a protexela. Ela está feliz de volver a telo ao seu lado, pero, poderán permanecer así xuntos para sempre?

Crítica Cineuropa

Antes deste filme, o director Masaaki Yuasa dirixiu unha serie de animación para Netflix, Devilman Crybaby (sobre o famoso personaxe do mangaka Gö Nagai), que era unha mostra abraiante de dominio da linguaxe do anime e un alarde de violenta creatividade. Aquí o director cambia de xénero e presenta unha comedia dramática adolescente, mostrando así a súa ductilidade, pero de novo pisa a fondo en cuestión de creación de ambientes e deseño de secuencias espectaculares. Iso si, leven ducias de kleenex para esta historia de surf e amores ultraterreais.