Ano
2019
Xusto antes de que Salvador Allende asuma a presidencia de Chile, Jaime, un mozo de 20 anos, solitario e narcisista, acoitela o seu mellor amigo (“El Gitano”) nun aparente arrebato paixonal. Na cadea coñece a “El Potro”, un home maior e respectado, a quen se lle achega desvelando unha fonda necesidade de agarimo e, á vez, o seu feroz desexo de recoñecemento. Xuntos establecen unha estreita relación de “amor negro”, como lle chaman no cárcere, o que lle permitirá a Jaime, agora “El Príncipe”, descubrir os afectos e as lealdades e, ao mesmo tempo, afrontar as loitas de poder tras as reixas.
Drama carcerario, tenso e asfixiante, o filme do chileno Sebastián Muñoz non se arreda á hora da representación nin da violencia nin do sexo explícito. Ambos se mesturan con bravura nesta historia que segue punto por punto o fío habitual da viaxe do heroe de Joseph Campbell, o autor daquel libro fundacional para as narrativas cinematográficas que foi O heroe das mil caras. Pero, de seguro que Campbell nunca imaxinou unha viaxe tan tortuosa e escura, que o director narra con pulso e ritmo.