ADAM

Abla rexenta unha humilde pastelaría na súa propia vivenda de Casablanca, onde vive con Warda, a súa filla de 8 anos. A súa rutina, gobernada polo traballo e polos labores domésticos, vese interrompida un día en que alguén lle chama á porta. Trátase de Samia, unha moza que está grávida e que busca emprego e teito. Á pequena chámalle a atención dende o primeiro momento a moza que acaba de chegar, pero a nai oponse inicialmente a acoller esta descoñecida na súa casa. A pesar de todo, aos poucos a determinación de Abla vai cedendo e a chegada de Samia ábrelles ás tres mulleres a posibilidade dunha nova vida.

Crítica Cineuropa

Algo realmente está a cambiar cando as historias de empoderamento no cinema occidental encontran eco en sociedades tan pouco dadas a este tipo de logros como a marroquí. En Adam fálase dos mesmos temas, pero encadrados na sociedade do país. Aquí os problemas son múltiples, e as dúas protagonistas deciden xuntar forzas para afrontar a súa condición de “apestadas” por seren viúva nun caso e nai solteira noutro. O debut de Maryam Touzani reflicte como emerxe unha familia alternativa onde, en teoría, non debería haber máis que resignación.